شارع طلعت حرب

خطرت ببالى فى الساعة 3:32 ظهرا

شعور غريب بـيجيني كل ما اتمشى فى طلعت حرب ، فعلا الشارع ده مليان بالحكايات والقصص ، انا حاسس إن تحت كل قطعة بلاطة او اسفلت فيه تحتها حكاية ، والاغرب اكـتر انى كل زيارة احس انى بشوف مشاهد سينمائية بـتـتعرض ورا بعدها

المشهد الاول : امام محطة المترو احد الاشخاص يرتدى قميص شكله لسه جديد أول لبسه واضح التطبـيقه لسه سايبه اثرها عليه : بكام يا ريس الولاعة دى

البائع : اى حاجه بجنيه يا بيه

اسمع فى الخلفية اتنين ماشين بـيتكلموا مع بعض راح واحد فيهم خابط التانى كلمتـين قاله : يا ابن اللــــ (شتيمه غير لائقة تم خذفها رقابيا) انا متفق معاه قبل ما تشوفه اصلا
على الجانب التاني من الرصيف طفل يبكى ملامحه اجنبية حبتيـن مامته ماسكه ايده وبتشده

الام :واحنا راجعين هاجبلك الطيارة

الطفل يزداد في البكاء

المشهد الثانى : امام احد محلات الخموراتنين شباب في مرحلة ما قبل العشرين

الاول : يا عم يالا بقه بتتفرج على ايه ؟

الثانى : يا عم اصبر لما نشوف العالم دول بـيتفحوا ايه

المشهد الثالث : ضجيج بالشارع واتنين من البائعين بـيجروا خوفا من المرافق وهما شيلين البضاعة

الاول : لم ياد الاشربات دى وقول لحماده يحصلنى

الثانى : ماتبعدش بعيد وخلى بالك من الفرش

المشهد الرابع : امام مكتب ايمن نور مشهد صامت جدا لا صوت غير كلاكسات العربيات وسرينة عربية اسعاف من بعيد

المشهد الخامس : عند تمثال طلعت حربانظر لتقاطع الشوارع امام التمثال وافتكر على طول احمد ادم فى فيلمه الرجل

الابض المتوسط وهو واقف تحت التمثال وبيقول اعمل ايه يا عم طلعت ؟ اسرق يا عم طلعت ؟

الغريب ان كل مره امشى فى نفس الشارع تتكرر نفس المشاهد فى بالى ، ويمكن تـتجدد مشاهد تانية المهم فى النهاية انتهى المشوار بدخولى مول طلعت حرب