ميه نيلى ووشوش طيـنى

خطرت ببالى فى الساعة 6:12 مساءا

من يومين خدنى مشهد فى احد شوارع الفيوم ، المنظر ماكنش غريب قوى قدر ما كان مؤثر في شخصيا طفل صغير

عمره لا يتجاوز اربع او خمس سنوات ، وشايل على ضهره شوال مليان بالكراتين والورق ، لو حولت اقدر وزن الشوال ده لو قلت ضعفين وزن الطفل نفسه يبقى مش ببالغ ، والاغرب من كده ان بينازع مع طفل اخر يمكن اكبر منه
بحوالى خمس ست سنين تقريبا علشان سبقه وخد رزق كان مرمي على الارض وهو عبارة عن قطعة من الكرتون المبلل بمية الشارع

يمكن يكون المنظر بيتكرر كتير قصاد عينا كل يوم ، لكن مش عارف ليه افتكرت لحن فاطمه لعمر خيرت فى الوقت ده ، وكأن فيلم تسجيلى تانى بيتجسد

بينى وبين نفسى خدتنى لحظه تفكير شاردة -وبعيدا عن المشاكل المادية والظروف الاجتماعيه لاسرته- تخيلت لو الطفل ده وهو ماشى يا ترى بيفكر زينا ؟
ولو فكر يا ترى بيقول ايه؟

يا ترى الطفل ده لسه فاكر يعني ايه لعب اطفال والحاجات بتاعت العيال المدللين دول اللي هو مش منهم ؟

يا ترى لسه فاكر عشرة عشرين تلاتين ارعبين خمسين ستين ميه خلاص لسه -خلاص لسه ؟

ولو الدنيا ضحكتله والتاريخ ابتسمله وكان ليه الحظ ان يكون له بلوج بأسمه يا ترى هيقول فيه ايه ؟

يا ترى هيدون ويقول انا جمعت النهاردة عشرين كيلو كراتين وبطمح انى اجمع بكرة تلاتين ؟

ولا يمكن يقول النهارده قهر وبكره قهر هو العمر فيه كم شهر ؟