والميـتـيـن شالـوا النـعـوش

خطرت ببالى الساعة 2:15 ظهرا

الدولاب القديم والسرير القديم للبيع
كانب والكراسى القديمة
والسرير القديم للبيع

صعب انك تلاقى حد فى مدينة الفيوم ميعرفش النداء الثورى دة ، علشان صاحب الكلمتين دول هو راجل بسيط بيلف شوارع وحوارى الفيوم كل يوم ، يشترى أى حاجة قديمة
وبعيدا عن السياسة وتصعيد العنف الاسرائيلى ، والصمت العربى المفرط ، افتكرت كلمات أغنية للشاعر الفيومى محمد

عبد المعطى بيقول فيها

شر البلية على لسانكم
والخيبة .. سبقت أفعالكم
ياد العقول الروبابيكيا
رمينها حتى فى أحزانكم

حتى العيون اتحجرت فيها الدموع
واتهد حيل الصبر قدام الحقيقة
كل القلوب اسمرت بين الضلوع
يا طول ليالى الحلم والضحكة البريئة
الحب هربان من الوشوش والميتين شالوا النعوش
ووقعنا فى فخ الوحوش
لما سقتنا الخسة اليد الدنيئة
لما سقتنا الخسة اليد الدنيئة

بعدها حسبتها بيني وبين نفسى ، ويمكن خدنى عقلى لبعيد ، وقلت حكمنا العرب باعوا عقولهم من زمان ، مش كان اولى بيها الراجل الغلبان ده ، اللي بيلف الشوارع كل يوم يقول حاجات قديمة للبيع ، على الاقل كان يمكن يقدرها كويس ، اهو يمسك الراس من دول بين اديه ويقول- بكام دى- زى محمد نجم فى مسرحية عش المجانين
لكن يظهر العالم دول باعوا دماغهم لحد تانى ، على أى حال لحد ما نعرف هما باعوها لمين اقولكم خلوا بالكم من دماغكم