لـمـا بـدأ الحـلـم يــلـون

خطرت ببالى فى الساعة 4:30 عصرا

نور* ده اسم طفلة لذيذة ، نور عندها اربع سنين ، نور ماسكة فى ايدها مصاصة لونها احمر ، نور بقيت شفايفها لونها احمر ، نور حطت فى شعرها وردة ، نور اترسم شعرها على وشها ، نور جمل حوارها غير مرتبة ، نور كلامها كله اسئلة ، نور بتقول يعنى ايه ويعنى ايه ، نور لما سئلتنى كنت لازم ارد حتى لو كانت الاجابة غير مرتبطه بمضمون السؤال نور يمكن تكون معندهاش القدرة على فهم اللي بقوله ليها بس لسه عندها حب الاستـماع ، عشان كدة لما سئلتنى كنت لازم اقول

س: ...........؟

ج: لا لا الكلام ده كان زمان وتحديدا وانا فى اولى ابتدائى ، ويظهر كده ان اهلى فى البيت شافوا انى فى السنه دى كبرت للدرجه اللي اقدر اروح فيه المدرسة لوحدى

س: ..............؟

ج: كل يوم كان بـيـتكون فى خيالى قصة جديدة بطلها شئ مختلف على مدار الطريق من البيت للمدرسة ، يعنى يمكن اشوف طفل رباط الفرده الشمال بتاع جزمته مفكوك افضل متابع شحـتـفة الرباط يمـين وشمال ، وتـتـنسج فى خيالى احداث وشخصيات كل ده والطفل ماشى ويمكن ولا على باله اصلا ان رباط جزمته محتاج يـتربط ، وقـتها حسـيت ليه ربنا وهب الانسان بسر قدرته على انه يرمز لكل شئ فى الوجود ده بأسم محدد ،ومع ذلك كانت لازم تـنـتهى احداث قصة كل يوم فى مكان ما فى الطريق وتحديدا عند شجرة دقن الباشا اللي قبل المدرسة بحبـتـين كانت شجرة فـتية وعفية ، يمكن مايكونش لها اثر دلوقتى فى الشارع ده

س: ...........؟

ج: مش بالظبط لكن وقتها كنت احس ان للمرة الأولى ممكن ريحة الشجر يكون لها ملمس ناعم بالشكل ده ، بعدها على طول اسمع صوت عم سعيد العجوز بـيقول حلو يا حلو وهو ماسك فى ايده غزل البنات وواقف عند باب المدرسة وساعتها يرن صوت امى فى ودانى ويقولى اوعاك تاكل حاجة من برة البـيت هـتـتعب ،والواحد برده بشر فى اوقات كتير قلبه بـيـتـقلب وعزمه بـيضعف ، لكن ارجع واقول لنفسى ايوة هو صحيح الكيس بـبريزة بس وفى حته قد كـــــــــــــــــــــدة ، بس انا حاسس بطعم غزلك على لسانى يا عم سعيد

س: .............؟

ج: الالوان الخشب و كراسة الرسم والاذاعة المدرسية وعصابات الفسحةوشنطة المدرسة الجلد كل الادوات دى بتـتآمر فى خفه عشان تفرغ كيانى من كل يأس وانفجار وتبدله بكل شئ فيه امل وتماسك ، اما فى الخلفية فبـتدور فى الذهن الاغنية الكرتونية ألف به ته ثه جيم حا خا ولحنها بـيعيد نفسه مرات ومرات وصولا إلى تلخيص كلمات الاغنية اللي يمكن بتقول بابا ماما وطنى علمى حرية قومية كفاح جهاد جندى وطنى شجاع

----------------------------------------------

نور دى طفلة كانت بتلعب امام احد قاعات المناسبات فى حفل زفاف احد اصدقائى دون سابق معرفة بـيها ولو حتى بأحد افراد اسرتها