انـــتــوا ولاد مـيـن فـيـهـم

خطرت ببالى فى الساعة 2:10 صباحا
قطر الحياة بيفوت
من غير صفير ولا صوت
نسمع ساعات تنهيد
من قلب قطر حديد
تنهيده جرحنا
وان كان فى قلبه هموم
هتكون ملامحه فى يوم
من نفس ملامحنا
فضفض يا قطر وقول
لسة الطريق موصول
اوصل وريحنا

لوجيت فى يوم وكتبلك القدر انك تكون احد ركاب القطارات المصرية وترددت تلك الابيات فى بالك ، فمضطر انى ابلغك آسفا ان القطر لا هيوصل ولا هيريحك
كنت زمان وأنا صغيرافتكران السفر دة متعة كبيرة ، يمكن عشان هقعد جنب الشباك واشوف بئه الخضرة والزرع ويمكن يشرد تفكيرى حبتين لما أشوف اندماج الأبيض والأسود فى حجارة الرصيف ، وقتها كنت اتخيل أن الدنيا هى اللي بتجرى من تحتنا مش أحنا اللي بندوس عليها ، وبعد شوية اعرف ان كل طريق سفر لابد وان يكون له نهاية ، فى العشر سنين اللي فاتوا دول اتبدل الاحساس دة واصبحت مابشعرش بكل الحاجات دى وانا مسافر ، بل بالعكس اصبح يوم السفر عندى يوم متعب وممل والطريق مبهم غامض باهت مش عارف ايه نهايته ، يمكن تقولوا متشائم جايز ولو انى غير كدة خالص

انا بصراحة ماكنتش عايز اتكلم فى موضوع حادثة قطرين بنها ، لأنى كنت متأكد انى مش هضيف ولا هأقول حاجة جديدة ، لكن من كام اسبوع كدة كتب الاستاذ أحمد بهجت في عموده صندوق الدنيا بالأهرام مقاله يمكن ماكنش لها علاقة بالحادث لا من قريب ولا من بعيد ، لكن من وجهة نظرى خلتنى اشوف الموضوع من زاوية تانية تماما ، المقالة كانت تحت عنوان قابيل وهابيل قال فيها
من فينا ينحدر من قابيل وأينا من ابناء هابيل
سؤال محير وصعب ، لكن جوابه يستدعى أن نعرف من هو قابيل ومن هو هابيل ، فهذان الاسمان هما الأصل الذى انحدرت منه البشرية
كان قابيل وهابيل ابنى آدم
كانا شقيقين احدهما صافى الروح بالحب ، والثانى معتكرا بالكراهية
يحدثنا القرآن الكريم أنهما قدما قربانين لله فتقبل الله من صفاء الروح ولم يتقبل من عكارة الكراهية ، كان المفروض أن توقظ الصدمة قابيل فيعود إلى الله بالندم ويسأله العفو ، لكن الصدمة أيقظت داخله أمرا آخر، مزيدا من الكراهية لشقيقه ، ترك السبب الأصلى واتجه نحو البراءة التى يمثلها شقيقه وقرر أن يحطم هذه البراءة
قال الأخ الشرير - لأقتلنك 00
قال الأخ الطيب - " انما يتقبل الله من المتقين ، لئن بسطت إلى يدك لتقتلنى ما أنا بباسط يدى إليك لأقتلك إنى أخاف الله رب العالمين "
تعالوا نتأمل كلمة الشرير ، لأقتلنك ، ثم تعالوا نتأمل تفسير الأخ البرئ ، إن خوفه من رب العالمين هو الذى يمنعه أن يرد على فكره القتل بالقتل

" لئن بسطت إلى يدك لتقتلنى ما أنا بباسط يدى إليك لأقتلك 00 " ما هو المبرر لهذا الاستسلام ؟ إنه التقوى إن الأخ الطيب يخاف أن يغضب الله ، وسوف يدفع ثمن رضاء الله عنه من حياته
من هم أبناء قابيل ، ومن هم أبناء هابيل ؟ أبناء قابيل هم أبناء الظالم ، هم السلاح والسكين والضربة ، أما أبناء هابيل فهم أبناء المظلوم ، ومنهم يخرج طابور الشهداء على امتداد العصور
أبناء هابيل هم أبناء الجرح وهم أبناء الألم ، أما أبناء قابيل فهم الأغلبية فى الارض ، وكثيرا يتعرض أبناء هابيل لما يشبه الإبادة ، ولولا رحمة الله تعالى لخلت الأرض لأبناء الظالم
ولكن أبناء هابيل دائما هناك أو هنا ، فى مكان مجهول لكنهم هناك دائما ولسوف تعرفهم من صفة بارزة يتصفون بها ، وهى انهم فى غاية الكرم ، فهم يقولون الحقيقة ويدفعون حياتهم ثمنا لقولهم هذا

خلصت المقالة وقعدت افكر طيب لو اعتبرنا ان كلام عمنا أحمد بهجت دة قاعدة وفرضنا يعنى انها مسلم بيها ، يبقى يا ترى الضحايا وشهداء الكوارث بتوع كل نكبة دول هيكونوا ولاد مين من الاتنين قابيل ولا هابيل ؟ ولو فرضنا انهم من ابناء المظلومين وأن فيهم من يوصف بالكرم وصفاء الروح - يعنى الغلابة من الشعب - يبقوا أكيد دول أولاد هابيل
وشويتين بدأت أسأل تانى ، احنا وصلنا إلى افتراض ان كل شهيد وكل قتيل من ضحايا أى كارثة سواء كانت حادثة قطر الصعيد ولا ضحايا العبارة المنكوبة ولا ضحايا قطرين بنها وغيرهم هما أولاد هابيل طيب فين أصحاب السلاح والسكين والضربة اللي اعتدوا عليهم عشان يصبحوا ضحايا ؟

يعنى عندنا القتيل ومش عارفين مين الجانى ، أنا فى اعتقادى ان كل مسئول على كرسيه له علاقة بكل حادث من دول هو قتل ضميره قبل ما يكون سبب فى قتل بنى أدم ، وأنا لو مكانه وحسيت انى مش اعرف أوفر الأمان ولو لحتى لشخص واحد ، هأقدم استقالتى فورا ، ووقتها اعتقد ان الشعب كله هيحترمنى ويقف فى صفى
لكن يفضل السؤال موجود يا ترى الكبار أصحاب البدل والجرفتات الشيك المسئولين عن أرواح البشر والعباد دول هيكونوا أولاد مين فيهم ولاد قابيل ولا ولاد هابيل ولا ولاد كـلــــــ ؟؟