جـيزة يـــــا اســـــطـى ؟؟
فى الكام سنة اللي فاتوا قدر الشعب المصرى انه يكون ثقافة خاصة بالمواصلات لدرجة وصلت لاختراع لغة اشارة مرتبطة بخطوط الميكروباص على حد وصف وجيه الصقار لثقافة الشعب فى الأهرام ، وجات على بالى الفكرة دى بعد ما عرفت من أحد الزملاء العراقيين المقربين لشخصى الكريم انه ناوى خلال اليومين الجايين دول ينقل شغله فى القاهرة ، وقتها كان سؤاله لي عن أسعار الشقق والمواصلات وغيره ، وقتها تخيلته وهو سايب القنابل والانفجارات والعربيات المفخخة واقف بيفتكر نموذج الاشارات لكل عربية ميكروباص فى مصر مفخخة بالبشر مش بالقنابل ، يعنى أقدر اديكم أمثلة كتير منا عارفينها وبيستعملها كل يوم
يعنى اللي عايز يركب أى حاجة من رمسيس لحلوان أو المعادى مثلا فكل اللي عليه يعمله هو انه يشير بكف ايده المستقيم الرأس للعربية ، ولوكان عايز ميدان الجيزة يبئى يخلى صوابعه لتحت ويحرك كفه شمال ويمين وهى طبعا نفس الاشارة من الهرم وفيصل للجيزة ، فى نفس الوقت اشارة الكف المستقيم الرأسى فى شارع الهرم لها اربعة جهات وهى التحرير أو رمسيس أو العتبة أو المؤسسة سسه سسه سسه
ولو كنت فى فيصل وعايز تروح بولاق الدكرور فعليك بالاشارة الجانبية بالاصابع شمالااتجاه منطقة بولاق ، ومن بولاق فأشارة التنصيص معناها الطالبية ، أما لو ضممت صباع الابهام والسبابة وسبت -باقى الصوابع الاربعة- قصدى التلاتة الاخرى فمعناها محطة التلات طوابق بفيصل
وطبعا بما ان السواح الزائرين لشوارع القاهرة مش بيركبوا ميكروباصات
فمش مطلوب منهم انهم يحفظوا هذاالقاموس الأشارى ، بس الطريف اللي فى الأمر انى حسيت ان فى ناس مبسوطه جدا بموضوع لغة الاشارة ده ، لدرجة انى شفت فى مرة واحد واقف على رصيف المترو وبيشاور بكفه وصوابع ايده لتحت -متحركة يمينا ويسارا- قال أيه عايز يروح الجيزة
وبما ان كتير من الشعب حابب الطريقة دى للتعبير عن المكان اللي عايز يروحه ، فأنا شايف ان على الحكومة واخص بالذكر وزارة الداخلية ورجال المرور بانهم يطبعوا دليل عام للاشارات دى وتوزع على كل مواطن ماثل شاخص كادح لأى عربية يركبها عشان يقضى مصلحته ، وهى تبقى فرصة يكسبوا ثواب ويدوا مساحة لمزيد من الاجتهادات لقوى الشعب المتضامن والمتحالف على ركوب الميكروباص بشكل يومى لمزيد من الاشارات الجديدة
بمناسبة المرور والشوارع افتكر لما كان عندى خمس ست سبع سنين كدة كان يشرد تفكيرى حبتين واتخيل انى قاعد على كرسى بتاع المدير اللي بيلف دة ومحدش يسأل اشمعنا ؟ وأحطة فى وسط شارع 26 يوليو وتحديدا وسط العربيات واقعد افكر يا ترى هيجى الوقت اللي ملاقيش ولا عربية معدية فى الشارع دة ،يعنى طفل بيتخيل حياة مصرية هادئة ولو للحظات حتى لو كانت فى اشارة مرور، أنا تعبت ، على أيدك يا اسطى ونزلنى
posted by Dmo3 Al Kohl at
١:١٦ م
|
3 comments
