عـــــم بـيـومــــى

خطرت ببالى فى الساعة 3:30 عصرا
عم بيومى السمسار(*) راجل ذى العسل بيحب يخدم كل الناس
من كام يوم سألنى واحد زميلى عن شقة أو بيت صغير للبيع بعد ما غلب به الحال من كتر اللف والبصبصه على بيوت وشقق خلق الله، فرديت عليه باستغراب هو انت مارحتش لعم بيومى السمسار ؟
فقال عم بيومى السمسار !! أنا رحت لسماسره كتيييييييييير ، مين عم بيومى دة ؟؟
فقلت له ده اللي هتلاقى عنده حل للمشكلتك ، وبما ان عم بيومى مالوش مكتب لحد دلوقتى ، فكان من الطبيعى انى اوصفله عنوان القهوة اللي بيحب ياخد عليها الشاى بتاعه
وفعلا فى اليوم التانى راح زميلى لمكان القهوة بعد ما كلم بيومى افندى على الموبيل وكان ده جزء من الحوار

بيومى : شوف يا استاذ المثل بيقول ادى مالك للي عنده مال وادى عيالك للي عنده عيال
زميلى : (مستغرب) تقصد ايه يا عم بيومى ؟
بيومى : (يضع كوب الشاى على الصينية) المقصد انى عندى لك بيت مايتفوتش ، فرصة حقيقية ، موقع ، ومساحة ، وسعر، وبيطل على شوارع أيه مائولكش ، هو اصحابه مستريحين ماديا وما يلزمهمش فلوس يعنى بس اخوات وعايزين يخلصوا بعضهم بئه فى الورث
زميلى : طيب جميل يا عم بيومى ، وده فين البيت اللقطه ده ، واصحابه طالبين كام ألف ؟
بيومى : ما هو أنا جيلك فى الكلام يا استاذ ، الحقيقة جالى واحد من يومين وعرضت عليه نفس البيت ، لكن هقولك أيه أصل اصحاب العقول فى مناحه ، الراجل اختلف مع اصحاب البيت على ألفين جنية وباظت البيعة ، فمن الأفضل انك تعرف سعره من اصحابه ويبئـى معاك مطلق الحرية فى الكلام ، وأنا كل ما علي انى أوصفلك مكانه ويسهلها ربنا فى الأول والأخر

وافق زميلى وقال اهى فرصة يمكن ربنا يكتب فيها الخير ، وفضل بيومى يوصف مكان البيت بنفس وصف الارجوز للعمدة مكان المتولى فى اوبريت الليلة الكبيرة ، متاهة ، ومتاهة ، لحد ما يبدو ان زميلى قدر إلى حد بعيد انه يعرف المكان

وتانى يوم راح صديقى العزيز لموقع البيت بعد عناء طويل من السؤال عن الشوارع إلى الوصول بعد تأكيد اهل المكان ان مافيش بيت معروض للبيع هنا غير البيت اللى هناك ده ، وبدأ يتكلم مع صاحب البيت اللي انكر معرفته ببيومى السمسار بعد ما سأله انت عرفت ازاى يا استاذ انى عارض البيت للبيع ؟
تجاهل الطرفين ما دار من احداث مسبقه لهذا التعارف ، ولكن كل ما لفت انتباه زميلى ان البيت فى ناس كتير قوى وشكلهم غريب ، ولكن مع كل ده عرف يوصل لشئ من الاتفاق على السعر المعروض وكان كل اللى باقى انه يروح تانى يوم بعربون صغير على سبيل ربط كلام ذى ما بيقولوا

وبالفعل فى اليوم اللي بعده راح هو وصديق ليه على معرفة بموضوع كتابة العقود وخلافه ، ورحب الراجل بيهم ، وفجأة حصل اللي ماكنش على البال ولا الخاطر، بيحكى الزميل العزيزبيقول اتملى البيت بناس كتيرة شكلهم اغرب من الناس اللي موجودين وعالم بتجرى وناس طلعه على السلالم وصوت من ورا الباب بيقول هاتلى العالم اللي فوق دى وفتشلى كل خرم فى البيت ، وقتها ادركت ان احنا فى ورطة كبيرة خصوصا بعد ما اختفى الراجل اللي كان قاعد معانا ، بيقول مابـئـتش عارف اهرب ولا اجرى ولا أعمل ايه ، كل اللى اقدر افتكره وقتها انى اتسمرت فى مكانى انا والراجل اللي معايه من غير ما لسانى ينطق بكلمه واحدة ، بعدها داخل شاب صغير فى السن عرفت انه ظابط بعد ما شفت الطبنجة فى جنبه ومعاه اتنين مخبرين ، طلب منا انه يتحرى البطاقة الشخصية ساعتها ايقنت الجمله اللي هيقولها بعد كدة للناس اللى معاه -هاتوهم- لكن كانت المفاجأه انه قال بكل هدوء مش العربية اللي قدام البيت دى بتاعتكم ، فرديت ايوه يا باشا دى عربيتى بس احنا مــــ فقطع ضابط المباحث كلامه وقال اتفضلوا لو سمحتوا امشوا وسيبونا نشوف شغلنا ، ونادى على احد المخبرين وأوصاه انه يوصلهم لحد عربية زميلى استعدادا انهم يروحوا بيوتهم بسلام

بعدها بساعات عرف زميلى ان صاحب البيت من تجار المخدرات يا عينى اللي على قد حاله ، يعنى ظبطوا عنده بتاع 10 كيلو حشيش و12 كيلو بانجو بس ، وكام ألف جنية حصيلة بيع يوم واحد ، وان المباحث حطت البيت تحت المراقبة من حوالى اسبوع فات ، وكانت ساعة الضبط هى نفس الساعة اللي كان زميلى فيها هناك ، وقتها ادرك صديقى العزيز انه لو كان حصل اتفاق واخد صاحبنا الفلوس منه على سبيل العربون كان من المؤكد انها هتتحرز من ضمن المضبوطات لحصيلة البيع ، أو فى اسوء الاحوال كان ممكن تعتبر المباحث ان زميلى واحد من ضمن الناس اللي عايزين بضاعة لولا ستر ربنا كان ممكن يرزقه بظابط غشيم يخدهم كلهم فى الرجلين لولا التحريات اللي كانت قبل الضبط عن شخصية زميلى واسباب وجوده فى الوقت ده كان الموضوع هيبقى مأساه ، الحمد لله على كل حال

الظريف اللي فى الموضوع كله انه لما راح يعاتب عم بيومى عن الشورة الهباب دى ، قال له عم بيومى عيب يا استاذ صاحب الحق عينه قوية ، وبعدين انت رحت فين ، البيت اللي اقصده فى الشارع اللي وراه مش فى الشارع ده ، ومن ساعتها وزميلى بيجيله كوابيس رهيبة ابطالها زوار الليل

ومن هذا الحين قلت فى بالى ليه عم بيومى ما يعملش اب تو ديت لطبيعة شغله ، يعنى ينزله اعلان فى الجرايد يقول مطلوب (سوكورتيرة) لا يشترط المؤهل لا يشترط اللغات لا يشترط القراءة ولا الكتابة بشرط ان تكون جميلة ، ويحاول انه يستغل تقنيات القمر الصناعى فى رصد الشوارع والمدن والعقارات ولو عن طريق جوجل ايرس، أهو يدخل العميل على بيومى بيه فى مكتبه بعد ما يحجز عند-السوكورتيرة- ويستعرض قدامه مكان العقار المعروض للبيع عن طريق الاقمار الاصطناعية بدل المتاهات دى اللى تدخل الناس اللومان من أوسع ابوابه ، وعشان كدة انتظروا

قريبا بالاسواق -------------------------------------
حفاظا على سمعة الناس تم الاستعانة بأسم بيومى كناية عن شخصية السمسار الغلبان ده ، والكاتب لا يلام من اى شخص عن اى تطابق بين الاسم والاحداث فى الواقع وتقع المسئولية كاملة على القارئ